fbpx

Borgin mín – Montreux

Borgin mín er liður á Kaffinu þar sem við ræðum við fráflutta Akureyringa um borgir sem þau búa í víðsvegar um heiminn. Með þessum lið vonumst við til þess að kynnast hinum ýmsu borgum enn betur og einstaklingunum sem þar búa. Hefur þig alltaf langað til að flytja erlendis en veist ekki hvert? Þá gæti borgað sig fyrir þig að fylgjast með þessum þræði. Bryndís Ylfa Jóhannesdóttir býr í Montreux þar sem hún stundar nám við Hótelsjórnun.

Bryndís Ylfa Jóhannesdóttir


– Hvers vegna býrð þú í borginni? Og af hverju valdirðu hana frekar en aðrar?

Ég hef alltaf verið hrifin af hótelum og túrisma og það að fara í nám tengt þeim bransa er eitthvað sem ég hafði lengi hugsað um. Þessvegna ákvað ég að fara í hótelskóla í Sviss þar sem landið er þekkt fyrir að hafa bestu hótelskóla í heiminum. Ég fékk Higher Diploma núna rétt fyrir jól í International Business in Hotel and Tourism Management frá César Ritz Colleges og ég er núna að læra við Hotel Institute Montreux fyrir Bachelornum sem ég klára  núna í sumar.

-Í hvernig húsnæði býrðu og hvar? (Stúdíóíbúð, herbergi, miðsvæðis, úthverfi) Og er það dýrara en að leigja heima á Íslandi?

Ég bý á svokölluðu “campus” sem er í göngufæri við allt það helsta hérna sem er frábært. Leiguverðið í Sviss er almennt hátt og því er ég ánægð með fyrirkomulagið í skólanum, ég er með fínt herbergi í einni af byggingum skólans sem er töluvert ódýrara fyrir mig heldur en ef ég væri að leigja. Miðað við þjónustuna sem við fáum hérna þá erum við að borga mjög sanngjarnt verð fyrir aðstöðuna en annars held ég að almennt leiguverð hérna sé mjög svipað og heima á Íslandi.

Fjallganga í Sviss ekki langt frÁ Montreux


-Er dýrt að lifa í borginni miðað við Ísland?

Það er því miður heldur dýrt að lifa hérna, þetta er mjög svipað og heima nema það er auðveldara að finna sér ódýr og góð vín.


-Hver eru frægustu kennileiti borgarinnar? Mestu túristastaðirnir?

Montreux er mjög þekkt fyrir “Montreux Jazz Festival” sem er haldin árlega í lok júní/byrjun júlí. Það er nærststærsta Jazz tónlistarhátíð í heiminum þar sem margir flottir artistar koma fram! Það skapast alveg svakalega skemmtileg stemming í bænum og það koma margir hingað til þess að koma á hátíðina.

Freddie Mercury kom fram á hátíðinni með Queen á sínum tíma og hann varð yfir sig hrifinn af borginni, keypti því íbúð og stúdíó í Montreux þar sem Queen tók upp síðustu plötuna sína “Made in Heaven”. Árið 1996 var gerð bronsstytta til heiðurs Mercury sem er nú ein af helstu kennileitum borgarinnar.

Montreux Jazz Festival


-Er einhver staður í borginni sem fáir vita af, en nauðsynlegt er að skoða?


Gamli bærinn! – Í efri hluta Montreux er eldri hluti borgarinnar þar sem eru gömul og falleg íbúðarhús og litla þröngar götur sem ekki margir fara að skoða né vita af.

-Uppáhalds veitingastaður/kaffihús í borginni?

Það er alveg frekar dýrt að fara út að borða hérna svo ég reyni að nýta mér matinn í skólanum eins og ég get. En þar sem ég elska sushi og tilheyrandi þá verð ég að segja “Huit” sem er japanskur veitingastaður sem ég hef farið nokkrum sinnum á.

-Kanntu tungumálið? Hvernig er tungumálið í samanburði við íslensku?

Það er töluð franska sem ég tala því miður ekki  þó svo ég hafi lært hana fyrir nokkrum árum.


-Varstu vör við eitthvað menningarsjokk þegar þú fluttir fyrst? Einhver hluti menningarinnar sem er svo gjörólíkur þeirri íslensku?

Menningin hérna er ekki gjörólík henni á Íslandi, en hinsvegar fékk ég smá menningarsjokk þegar ég flutti hingað fyrst sumarið 2016. Þá bjó ég í frönskum smábæ þar sem nánast enginn af localnum talaði ensku, það var oft mikið basl að fá hjálp í búðum eða bara biðja um einföldustu hluti.


-Hvað einkennir heimamenn?

Það sem ég hef tekið eftir með heimamenn er að þeir eru kurteisir og hógværir.

-Helstu kostir borgarinnar?

Montreux er ótrúlega falleg borg og það er stutt í allt og hér er allt sem maður þarf! Það þarf til dæmis ekki að fara langt til þess að komast í fjallgöngur eða fara á snjóbretti.
Lestarkerfið er líka mjög einfalt  þannig það er ekkert mál að ferðast á milli borga og það er mjög mikill plús við að vera í Sviss að maður er svo miðsvæðis, ekkert mál að skjótast til Ítalíu, Frakklands og Þýskalands!

 

Lake Geneva og Montreux yfir sumartímann


-Helstu gallar borgarinnar?

Vantar algjörlega kósy kaffihús þar sem maður getur sest niður til þess að læra og fengið sér gott kaffi eða bjór!


-Gætirðu séð fyrir þér að setjast að til frambúðar í þessari borg?

Montreux býður því miður ekki uppá þau tækifæri sem ég er að leitast eftir að loknu námi, þannig ég verð að segja nei.