Dæmd fyrir líkamsárás gegn fyrrverandi sambýlismanni

Kona frá Akureyri hefur verið dæmd í 45 daga skilorðsbundið fangelsi fyrir líkamsárás. Atvikið átti sér stað á heimili fyrrverandi sambýlismanns konunnar þann 29. maí síðastliðinn.

Samkvæmt dóminum veittist konan að manninum og henti að honum ilvatnsglasi og blómapott úr leir ásamt því að slá hann ítrekað og klóra. Maðurinn hlaut klórför í kringum háls, á bringu og niður að lífbeini, á handleggjum og yfir olnbogum, á fótum og á mjöðm, eymsli í hnjám og baki, og kúlu yfir úlnlið.

Dómari taldi 45 daga skilorðsbundið fangelsi hæfilega refsingu þar sem konan viðurkenndi sök og vegna vandkvæða í einkalífi hennar. Hún var jafnframt ákærð fyrir innbrot en fallið var frá þeim hluta sakaratriða.