Dýralæknafélag Íslands harmar ákvörðun bæjarstjórnar Akureyrar

Dýralæknafélag Íslands harmar ákvörðun bæjarstjórnar Akureyrar

Dýralæknafélag Íslands hefur sent frá sér ályktun þar sem bann við lausagöngu katta á Akureyri frá 1. janúar 2025 er gagnrýnt.

Bæjarstjórn Akureyrarbæjar ákvað á fundi sínum í vikunni að lausaganga katta yrði bönnuð í bænum frá árinu 2025. Málið hefur vakið mikla athygli á landinu öllu.

Ályktun Dýralæknafélags Íslands má lesa hér að neðan.

Sjá einnig: Lausaganga katta verður bönnuð á Akureyri

Sjá einnig: Hissa á því að Sjálfstæðisflokkurinn banni lausagöngu katta: „Er þetta ekki flokkurinn sem er á móti boðum og bönnum?“

Ályktun Dýralæknafélags Íslands um bann við lausagöngu katta

Dýralæknafélag Íslands (DÍ) harmar að bæjarstjórn Akureyrar hafi samþykkt bann við lausagöngu katta í bænum frá 1. janúar 2025.

DÍ þykir sérstakt að það skuli gengið svona hart til verks, í stað þess að framfylgja samþykktum Akureyrarbæjar sem eru í gildi. Líftími katta er að meðaltali 14-18 ár, því eru sólarlagsákvæði um að bannið skuli taka gildi eftir einungis rúm 3 ár allt of stutt. Afar erfitt er að loka kött inni, sem er nú þegar vanur að fara sinna ferða.

Þetta mun setja marga kattaeigendur í erfiða stöðu, þar sem valið mun jafnvel standa á milli þess að láta aflífa gæludýrið sitt eða koma því á nýtt heimili utan bæjarins. Kostir þess að umgangast gæludýr eru vel þekktir og gæludýr geta aukið lífsgæði bæði hjá börnum og fullorðnum í formi andlegs- og líkamlegs ávinnings.

Kettinum er eðlislægt að kanna umhverfi sitt og að leyfa þeim að ganga frjálsum veitir þeim andlega örvun og minnkar streitu hjá þeim. Utandyra geta þeir iðkað sína náttúrlega hegðun eins og að klóra og merkja. Útiumhverfið er flókin blanda af mismunandi lykt, hljóðum, áferð o.fl sem er sí breytilegt og fullnægir þeirra eðlislæga atferli. Þó sumir kettir, sem þekkja ekki annað, sætti sig við að vera innikettir eru fleiri sem höndla það ekki og getur innilokun leitt til streitu og hegðunar-vandamála vegna vanlíðunnar t.d. merkinga eða árásargirni.

Varðandi áhrif lausagöngu heimiliskatta á fuglalíf, eru engar skýrar vísindalegar sannanir fyrir því að lausagöngubann katta hafi jákvæð áhrif á fuglastofna. Dýralæknafélag Íslands telur það mun raunhæfari lausn að taka á vandanum á annan hátt en með að banna lausagöngu. Til dæmis má nefna átak í fækkun villikatta, aukna fræðslu til eigenda um leiðir til að draga úr veiðigetu ( t.d bjöllur, kragar) og útgöngubanni að næturlagi (17-09) á varptíma fugla. Með þessu er hægt að draga úr tjóni á lífríki án þess að hafa áhrif á velferð katta.

Það er því mat Dýralæknafélags Íslands að með banninu er vegið að eðlislægu atferli kattarins og velferð hans.

Bára Eyfjörð Heimisdóttir,
formaður Dýralæknafélags Íslands

Sambíó

UMMÆLI

Sambíó