Hljómsveitin GRL PWR kemur fram á Græna Hattinum í kvöld. GRL PWR er verkefni sem einblínir á að peppa konur í tónlist og spila tónlist með konum.
Grunnmeðlimir sveitarinnar eru söngkonurnar Salka Sól Eyfeld, Elísabet Ormslev, Stefanía Svavars, Þuríður Blær og Karó. Karitas Harpa, Svala og GDRN hafa einnig slegist með í hópinn.
Salka Sól segir í samtali við Kaffið.is að mikil spenna sé í hópnum fyrir tónleikana á Akureyri.
„Við erum að tryllast. Þetta verða síðustu tónleikarnir okkar í einhvern tíma svo að spenningurinn er mikill,“ segir Salka.
GRL PWR eru þekktar fyrir góða stemningu á tónleikum sínum. Hljómsveitin hefur verið að koma mikið fram á árshátíðum og slíku en aðalgigg hljómsveitarinnar í sumar verður á Þjóðhátíð í Eyjum.
Salka segir að þær stefni á að mynda geggjaða stemningu á Græna Hattinum í kvöld.
„Um síðustu helgi á Gauknum myndaðist einhver stórkostleg og sterk stemning þar sem allir dönsuðu og sungu með allan tímann. Við stefnum á sama partí í kvöld.“
UMMÆLI