Kristnesspítali fagnar 90 ára afmæli sínu í dag, því frá 1. nóvember 1927 hefur verið rekin heilsutengd starfsemi í Kristnesi. Spítalinn hefur frá árinu 1993 verið hluti af Sjúkrahúsinu á Akureyri, SAk (áður FSA). Í hátíðardagskrá í Kristnesi í dag var farið yfir sögu spítalans í fortíð og nútíð og skyggnst inn í framtíð hans auk þess spítalanum voru færðar margar góðar gjafir.
Dagskráin hófst á því að Brynjar Karl Óttarsson, höfundur nýútkominnar bókar um sögu berklasjúklinga á Kristneshæli, og María Pálsdóttir, leikkona, en hún ólst upp í Kristnesþorpinu, greindu frá ýmsu sem tengist Kristnesspítala og sjúklingunum þar á árunum sem hann var berklahæli. Því næst fjallaði Pétur Halldórsson, fræðslufulltrúi Skógræktarfélags Íslands, um umhverfisáhrifin í Kristnesi, en þau eru mjög mikil sem m.a. birtast í ræktarlegu skóglendinu þar. Ingvar Þóroddsson, forstöðulæknir í Kristnesi, fjallaði um starfsemina frá 1970 til dagsins í dag. Hann ræddi einnig um mögulegar nýjungar í starfseminni á komandi árum.
90 ára draumur rættist
Hollvinasamtök Sjúkrahússins á Akureyri afhentu Kristnesspítala 6 milljónir króna að gjöf, sem verður varið til kaupa á þjálfunarbúnaði í sjúkraþjálfun og hægindastólum á legudeildirnar.
Oddfellowstúkurnar á Akureyri færðu spítalanum 3 milljónir króna að gjöf og verða þær notaðar til kaupa á tveimur sérhönnuðum loftdýnum, tveimur sjúkrarúmum sem þola þunga einstaklinga, æfingastandbekk og ferðasúrefnissíu. Þá verður hluta fjármunanna varið til kaupa á snjóblásara til að skjólstæðingar, aðstandendur þeirra og starfsfólk spítalans geti notið aukinnar útivistar að vetri til. Fram kom við afhendingu gjafanna að með tilkomu snjóblásara rættist 90 ára gamall draumur þeirra sem stóðu að byggingu Kristneshælis.
Þrjú kvenfélög færðu spítalanum peningagjafir; Kvenfélagið Iðunn og Kvenfélagið Hjálpin, bæði í Eyjafjarðarsveit, og Kvenfélag Fnjóskdæla og verða fjármunirnir notaðir til kaupa á útibekk og ferðasúrefnissíu. Þá færði Krabbameinsfélag Akureyrar og nágrennis spítalanum Lazyboy-stól að gjöf og Eyjafjarðarsveit færði spítalanum þrjá setbekki úr lerki, sem settir verða upp í skóginum við Kristnes.
Þess má til gamans geta að Kvenfélagið Hjálpin, þá í Saurbæjarhreppi hinum forna, setti árið 1918 í gang söfnun til að fjármagna byggingu Kristneshælis.
Sýnir að mjög margir hugsa hlýlega til okkar
Fjölmörg ávörp voru flutt, m.a. sagði Bjarni Jónasson, forstjóri SAk, í ávarpi sínu að Kristnesspítali hafi leikið lykilhlutverk í heilbrigðisþjónustu allt frá því hann tók til starfa og muni gera áfram. „Þetta er þjónusta sem íbúar á starfssvæði sjúkrahússins kunna vel að meta svo sem sjá má af þeim veglegu gjöfum sem spítalanum hafa verið færðar nú og í gegnum tíðina. Það er ánægjulegt að ná að minnast þessara tímamóta í dag, rifja upp söguna og þá baráttu sem það kostaði að koma henni á koppinn á sínum tíma, halda henni við og þróa hana áfram samfélaginu til heilla.“
Ingvar Þóroddsson, forstöðulæknir í Kristnesi, sagði að þessar höfðinglegu gjafir hjálpuðu mjög mikið til við að endurnýja nauðsynlegan tækjakost og búa enn betur að skjólstæðingum sjúkrahússins.
„Gjafirnar sýna að mjög margir muna eftir Kristnesi og hugsa hlýlega til okkar. Fyrir það er ég afskaplega þakklátur.“
Tvö meginmarkmið
Ingvar sagði að meginmarkmiðin með starfseminni í Kristnesi væru tvö: Annars vegar að endurhæfa fólk á hvaða aldri sem er til að það geti verið sem lengst heima og á vinnumarkaði. Hins vegar að endurhæfa aldraða með það að markmiði að þeir geti dvalist sem lengst heima hjá sér.
„Það hefur einnig sýnt sig að aðferðir endurhæfingar virka mjög vel á fólk sem á við geðraskanir að stríða – en sá hópur er stór og fer stækkandi. Við viljum gjarnan koma meira að meðferð og endurhæfingu þess hóps í náinni framtíð,“ sagði Ingvar.
UMMÆLI