Samherji á Dalvík bauð í filippseyskt matar- og skemmtikvöld

Starfsfólk fiskvinnsluhúss Samherja á Dalvík og gestir skemmtu sér saman síðastliðið laugardagskvöld í mötuneyti félagsins. Starfsmannafélagið Fjörfiskur efndi til filippseysks matar- og skemmtikvölds en hjá Samherja á Dalvík starfa rúmlega tuttugu manns sem rekja uppruna sinn til Filippseyja. Þetta kemur fram á vef Samherja, þar segir einnig:

Hazel Capin og Reynir Magn‎ús Víglundsson, sem bæði eru frá Filippseyjum, segja að undirbúningur kvöldsins hafi verið töluverður. „Við skreyttum salinn og kynntum landið okkar með ýmsum hætti. Eldamennskan hófst fyrir alvöru á föstudagskvöldinu og allt var orðið klárt áður en fyrstu gestirnir komu í hús, enda eru allar aðstæður í húsinu góðar,“ segir Reynir Magnús á vefnum.

„Matarmenningin á Filippseyjum er á margan hátt allt önnur en hér á Íslandi. Það fékkst ekki allt hráefni hérna fyrir norðan og þurftum þess vegna að fara til Reykjavíkur til að versla ýmislegt en við náðum að útvega flest það sem til þurfti í matargerðina. Við vorum með nokkra mismunandi rétti á hlaðborði og merktum þá með ýmsum fróðleik. Í lokin voru síðan nokkrir vinsælir eftirréttir,“ segir Hazel Capin.

Íbúar Filippseyja eru rúmlega 90 milljónir. Eyjarnar eru samtals 7.100 en nærri 900 þeirra eru í byggð. Filippseyjar eru annálaðar fyrir ríka matarmenningu, með áhrifum frá öllum heimshornum. Hrísgrjón eru algeng sem grunnur í matargerðina og hvert hérað er með sinn stíl.

„Þegar gestirnir gengu í salinn tókum við á móti þeim samkvæmt okkar hefðum, klædd þjóðbúningum sem eru mismunandi eftir sýslum. Við sýndum líka myndbönd um vinsæla ferðamannastaði, sem vonandi leiða til þess að einhverjir ákveða að skella sér í heimsókn til Filippseyja. Ferðalagið er að vísu ansi langt en algjörlega þess virði,“ segir Reynir Magnús.

Ragnheiður Rut Friðgeirsdóttir formaður starfsmannafélagsins Fjörfisks segir að matar- og skemmtikvöldið hafi heppnast einstaklega vel.

„Ég fylgdist svolítið með undirbúningnum, samheldnin var einstök. Gestrisni Filippseyinga er annáluð, sem skilaði sér vel um helgina. Þetta var frábært kvöld.“

Hægt er að sjá myndir frá viðburðnum á vef Samherja þar sem fréttin birtist.