Fagkaup hefur opnað glænýja Sindra verslun í hjarta atvinnusvæðisins að Óseyri 1, á Akureyri. Nýja verslunin er yfir 1.500 fermetrar að stærð og þar má finna gríðarlegt úrval vara en verslunin sameinar undir einu þaki vöruframboð tveggja leiðandi vörumerkja í byggingariðnaði og iðnþjónustu: Sindra og Áltaks. Með þessari ráðstöfun styttist vegalengd viðskiptavina að öllum helstu verkfærum, efni og búnaði sem þeir þurfa til að keyra verkefnin áfram, frá grunni upp í þak.
Fullkomin framleiðsluaðstaða fyrir báru og klæðningar
Í húsnæðinu er jafnframt komin ný, hágæða framleiðslulína með sérhannaðri völsunarvél sem gerir það kleift að framleiða bæði bárujárn og álklæðningar á staðnum. Þetta þýðir styttri afgreiðslutíma og aukið öryggi í framboði efna og möguleikum á sérsniðnum lausnum fyrir viðskiptavini sem vilja hámarka endingu og fagurfræði í þak- og veggklæðningum.
Opnun föstudaginn 13. júní
Til að fagna þessum merku tímamótum bauð Fagkaup viðskiptavinum, samstarfsaðilum og öðrum aðilum á svæðinu að taka þátt í formlegri opnun föstudaginn 13. júní. Þar gafst gestum kostur á að skoða verslunina, kynna sér framleiðslulínuna og njóta léttra veitinga.
Frá opnun glæsilegrar verslunar Sindra á Akureyri.
„Þessi opnun markar stórt skref í því að efla nærveru okkar á Norðurlandi,“ segir Haraldur Líndal, forstjóri Fagkaupa.
Haraldur Líndal, forstjóri Fagkaupa, ávarpaði gesti í tilefni opnunarinnar.
„Við erum afskaplega þakklát fyrir þær móttökur sem við höfum fengið á norðurlandiog ánægð að geta bætt okkar þjónustu hér enn frekar. Við trúum því að þessi viðbót muni hjálpa til við að auka afköst og efla uppbyggingu á svæðinu,“ segir Haraldur.
Opnun Sindra verslunarinnar á Akureyri er liður í markvissri stækkunarstefnu Fagkaupa, sem miðar að því að bæta aðgengi iðnaðarmanna, verktaka og áhugafólks að traustu vöruúrvali, sérhæfðri ráðgjöf og innlendri framleiðslu.
UMMÆLI