Starfsfólk FÉLAK, félagsmiðstöðva á Akureyri, hefur gagnrýnt og lýst yfir djúpstæðum áhyggjum vegna skipulagsbreytinga sem samþykktar voru af bæjarráði Akureyrar fyrr í vikunni en samhliða þeim var öllu starfsfólki félagsmiðstöðva í bænum sagt upp. Starfsfólk hefur skrifað opið bréf sem má lesa hér.
Á þriðjudaginn síðastliðinn var öllu starfsfólki sagt upp störfum og sumum boðin ný störf innan Akureyrarbæjar. Breytingarnar fela í sér að félagsmiðstöðvar heyra undir skóla sem starfsfólk FÉLAK segir að sé beinlínis í andstöðu við viðurkenndar fræðilegar ráðleggingar og faglegar verklagsreglur í æskulýðsstarfi.
Í kjölfarið verður starf Ungmennahússins sem þjónustar börn á aldrinum 16-18 ára og Virkisins, þjónustu- og ráðgjafasetur sem þjónustar fólk á aldrinum 18-20 ára, flutt í tvær aðskildar einingar með ólíkum áherslum.
Í bréfinu sem starfsfólk FÉLAK skrifaði er sérstaklega bent á að ekki var haft samband við Ungmennaráð Akureyrar við undirbúning breytinganna, þrátt fyrir að það gangi gegn viðmiðum Barnvæns sveitarfélags sem Akureyrarbær hefur skuldbundið sig til að fylgja. Jafnframt að breytingarnar gangi gegn nýjum æskulýðslögum sem verða lögð fram fyrir Alþingi næsta haust, lögum sem leggja ríka áherslu á virka þátttöku barna og ungmenna, lýðræði og sjálfstæði æskulýðsstarfs.
UMMÆLI