Ég er fæddur á Akureyri á því herrans ári 1959 og ólst upp nyrst í ytra Þorpinu með Krossanesborgirnar, Bárufellsklappirnar og sjávarsíðuna nánast í bakgarðinum. Foreldrar mínir voru Benedikt Kristjánsson vélstjóri eða Bensi í Bót og Sigrún Aðalsteinsdóttir, betur þekkt sem Sída í Íþróttahúsinu. Aðalleiksvæði í æsku voru göturnar í Holtahverfinu, Sandgerðisbótin þar sem afi minn átti heima og innan um trillukarlana þar.
Aðal knattspyrnuvöllur Þorparanna í þá daga var í Gröfunum svokölluðu milli Miðholts og Undirhlíðar. Reyndar var íþróttaferill minn frekar stuttur enda hæfileikarnir svo sem ekkert til að hrópa húrra fyrir en sem dægrastyttingu hafði ég klettaklifur, kajakróðra og sprang í gamla löndunarkrananum í Krossanesi og síðasta jaðarsportið í æsku var fallhlífarstökk með fallhlífarklúbbi Akureyrar.
Á fimmtánda ári réði ég mig svo á síðutogarann Svalbak EA 2 sem var í eigu Útgerðarfélags Akureyringa og er skemmst frá því að segja að sjómennska var mitt lifibrauð næstu 35 árin. Fyrst togarasjómennska síðar á uppsjávarveiðum sem og á vertíðarbátum víðs vegar um landið þar til að lokum ég festi mig í sessi hjá ÚA. Fyrst sem háseti, síðar stýrimaður og skipstjóri. Um fimmtugt hætti ég atvinnusjómennsku og hóf vinnu í landi, sem og nám í blikksmíði og lauk sveinsprófi í þeirri grein 52 ára gamall. Í blikkinu var ég í níu ár en sleit í raun aldrei tengingu við sjóinn því ég eignaðist minn eigin bát og stundaði strandveiðar um tíma auk þess sem ég hef í fríum siglt sem skipstjóri á mótorbátnum Húna ll og tekið þátt í mörgum ævintýrum í þeim félagsskap sem Hollvinir Húna eru.
Í dag starfa ég sem skipstjóri hjá Hafnasamlagi Norðurlands (Akureyrarhöfn) og þar er enn ein tengingin við sjóinn og sæfarendur sem hentar mér eitthvað svo afskaplega vel.
Tvítugur flutti ég til Hríseyjar þar sem ég kynntist konunni minni Jennýju Ragnarsdóttur og áttum við okkar fyrsta heimili þar eða til ársins 1995. Síðan fluttum til Akureyrar og höfum búið þar síðan, ýmist á Brekkunni eða í Þorpinu. Í dag eigum við fimm uppkomin börn og þrjú barnabörn. Mín helstu áhugamál eru hjólreiðar af ýmsu tagi, gönguferðir, útivist sem og veiðar, þó aðallega sjóstangaveiði og lítils háttar skotveiði. ,,Hér er best búa‘‘.
Víðir Benediktsson skipar 9. sæti L-listans fyrir komandi bæjarstjórnarkosningar.
UMMÆLI