Intersand MaxCare 12 kg | Gæludýr.is

Kabarett lofsunginn eftir frumsýningarhelgi – „Svona á leikhús að vera“Mynd: Leikfélag Akureyrar.

Kabarett lofsunginn eftir frumsýningarhelgi – „Svona á leikhús að vera“

Söngleikurinn Kabarett, eftir Joe Masteroff, var frumsýndur í Samkomuhúsinu föstudaginn síðastliðinn. Uppselt var á frumsýninguna en sýningin er jafnframt 326. sviðsetning Leikfélags Akureyrar. Frá frumsýningu hefur einróma lof gesta verið áberandi á samfélagsmiðlum þar sem fólk virðist vera yfir sig hrifið af sýningunni, leikurunum og upplifuninni í heild sinni.

Flottir leikarar, rétt valið í hlutverk, frábær leikstjórn = BÚMM! 
Þórgnýr Dýrfjörð var mjög ánægður með sýninguna ef marka má facebook-færslu hans á föstudaginn eftir frumsýninguna. Þar segist hann vera orðlaus yfir leikurunum, hljómsveitinni og sýningunni í heild sinni.

„Ég fór að sjá söngleikinn Kabarett sem frumsýndur var Samkomuhúsinu í gær. Veit ekki hvort ég get fært í orð hvað mér fannst sýningin stórkostleg. Þetta er stórsýning í allri merkingu orðsins og gríðar mikið í hana lagt. Sama hvar borið er niður, allt geislar af ástríðu og krafti og brjálaðri skemmtun – og undir liggja millistríðsárin í Berlín tryllt og viðsjárverð.

Tíu manna æðisleg hjómsveit, tónlistin dásamleg, dramatísk saga og raunar sögur og frammistaða leikaranna er lyginni líkust. Andrea Gylfa og Karl Ágúst Úlfsson halda salnum ítrekað í greipum sínum í áhrifamestu ástarsögu verksins og kornungir ný- eða nýlega útskrifaðir leikarar sem eru sumir að stíga sín fyrstu skref í atvinnuleikhúsi vinna leiksigra. Sem sagt: Flottir leikarar, rétt valið í hlutverk, frábær leikstjórn = BÚMM!“ 

Ég hvet ykkur, ég brýni ykkur, ég öskra: farið í leikhús
Oddur Bjarni Þorkelsson, einn meðlimur Ljótu Hálfvitanna, lofsamar sýninguna einnig og segir að svona eigi leikhús að vera.

„Ég fór að sjá Kabarett hjá Leikfélagi Akureyrar um helgina, í Samkomuhúsinu. 
Þetta er svo innilega frábær sýning. Hún er svo fagmannlega og fallega unnin á öllum póstum, hvort heldur það sem auganu eða eyranu mætir. Hún er hrífandi, fyndin, hljómfögur og hræðileg. 
Það er hvergi slegin feilnóta, ekki í einni einustu deild – Ég hvet ykkur, ég brýni ykkur, ég öskra : – farið í leikhús. Farið að sjá Kabarett. Þið sjáið aldrei eftir því. Svona á leikhús að vera.“ 

Leikhússtjórinn Marta Nordal er leikstjóri verksins en hinn heimsfrægi danshöfundur Lee Proud sá um að semja dansatriði sýningarinnar. Uppsetningin er á vegum allra sviða Menningarfélags Akureyrar; Leikfélags Akureyrar, Sinfóníuhljómsveitar Norðurlands og Viðburðasviðs MAk. Með aðalhlutverk fara Andrea Gylfadóttir, Birna Pétursdóttir, Hákon Jóhannesson, Hjalti Rúnar Jónsson, Jóhann Axel Ingólfsson, Ólöf Jara Skagfjörð og Karl Ágúst Úlfsson.

Kabarett er sýnt í Samkomuhúsinu í nóvember.

Um Kabarett (af heimasíðu MAk)

Velkomin í Kit Kat-klúbbinn í Berlín þar sem allir mega vera það sem þeir vilja. Hér munu skemmtanastjórinn, söngkonan Sally Bowles og kabarettstúlkurnar kynna fyrir þér tryllta og myrka afkima næturlífsins þar sem allt er leyfilegt nema áhyggjur og hversdagsleiki. 

Árið er 1931. Við fylgjumst með Sally og rithöfundnum Cliff lifa og hrærast í skemmtanalífi Berlínar en á meðan íbúarnir fljóta sofandi að feigðarósi eykst hryllingurinn í kringum þá og tilveran breytist í martröð. Söngleikurinn Kabarett var frumfluttur á Broadway árið 1966 og naut strax mikillar hylli. Síðar sló samnefnd kvikmynd Bob Fosse með Lizu Minelli í aðalhlutverki umsvifalaust í gegn og hlaut átta Óskarsverðlaun árið 1973. Upprunalega framleitt og leikstýrt í New York af Harold Prince. Flutt með leyfi Nordiska Aps – Kaupmannahöfn.

Sambíó

UMMÆLI

Sambíó