Sýning undir heitinu Sköpun bernskunnar hefur árlega verið sett upp í Listasafninu á Akureyri frá 2015. Laugardaginn 28. febrúar kl. 15:00 verður sýning ársins 2026 opnuð í Ketilhúsi, Listasafninu á Akureyri. Markmið sýningarinnar er að efla safnfræðslu og gera sýnilegt og örva skapandi starf barna á aldrinum fimm til sextán ára. Þátttakendur hverju sinni eru skólabörn og starfandi myndlistarmenn ásamt Minjasafninu á Akureyri / Leikfangahúsinu.
Í ár var myndlistarkonunni Sunnu Svavarsdóttur boðin þátttaka í verkefninu. Í verkum sínum opnar Sunna á samtal um hvernig við rötum í gegnum veröldina með skynfærum okkar. Hún beinir athyglinni að upplifun á ákveðnum augnablikum sem eru að mestu skynjun snertingar og lyktar. Forvitnin við að finna leiðir til að lengja þessi augnablik eru oftast upphafspunktur verka hennar.
Skólarnir sem taka þátt að þessu sinni eru leikskólinn Tröllaborgir og grunnskólarnir Brekkuskóli, Glerárskóli, Naustaskóli og Oddeyrarskóli. Í vetur komu skólabörnin í Listasafnið og unnu verk sín fyrir sýninguna undir handleiðslu listamannsins. Þar fengu þau tækifæri til að kynnast Sunnu og skapa eigin verk, innblásin af verkum hennar.
Sýningarstjóri er Heiða Björk Vilhjálmsdóttir.
COMMENTS