Aktóberfest Akureyrar er stærsta bjórhátíð Norðurlands. Hátíðin dregur nafnið sitt af Októberfest sem er þýsk þjóðhátíð með yfir 200 ára sögu, þar sem tónlist, dans, matur og bjór sameinast í einni stórri veislu. Nú er komið að Akureyri að taka við keflinu því laugardaginn 11. október verður Víking Brugghús Portið sett í sannkallaðan Oktoberfest gír. Við settumst niður með skipuleggjendum, þeim Halldóri Kristni og Davíð Rúnari, til að forvitnast nánar um hátíðina:
Hvað er Aktóberfest Akureyrar?
„Þetta verður mögulega stærsta Októberfest sem haldið hefur verið á Norðurlandi. Við ætlum að bjóða upp á ekta Októberfest-stemningu, bæði í mat, drykk og dagskrá. Gestir mega búast við lifandi tónlist, fjölbreyttri afþreyingu, leikjum og dansi fram á nótt. Þetta verður hátíð þar sem allir geta fundið eitthvað við sitt hæfi, hvort sem það er að njóta bratwurst og pretzel, taka þátt í leikjum eins og King of Cornhole eða einfaldlega að skála með vinum í góðum félagsskap.“
Hátíðin verður haldin í porti Víking Brugghús og segja skipuleggjendur að svæðið passa vel fyrir stemninguna. Risatjaldi verður komið fyrir með borðum og stólum og verður breytt í þýskan hátíðarsal með nóg af pláss fyrir gesti og tónlistarmenn. Þeir tónlistarmenn sem munu meðal annars stíga á svið verða Hr. Eydís, Úlfur Úlfur, Gunni Óla úr Skímó og DJ Ayobe. Guðni Braga verður með Partybingo og Karaoke auk þess sem boðið verður upp á bratwurst, pretzel, bjórþamb, skíðaskot og keppnina King of Cornhole.
Svæðið opnar klukkan 17:00 á laugardaginn og miðasala fer fram í gegnum Tix.is, einnig geta hópar haft samband við skipuleggjendur á Facebook og bókað þar.
„Gestir mega búast við skemmtilegasta degi ársins. Þetta verður kvöld fullt af tónlist, hlátri, leikjum og gleði. Við viljum að fólk komi í rétta gírnum – jafnvel í lederhosen og með októberfesthatta en Partýlandið hér á Akureyri er einmitt með mikið af búningum og fylgihlutum til sölu bæði fyrir karla og konur. Að þessu tilefni við viljum að fólk fari all inn og taki þátt í alvöru Októberfest partýi,“ segja skipuleggjendur að lokum.
COMMENTS