Akureyrarbær hefur boðað til hverfisfundar í Giljaskóla með íbúum giljahverfis, bæjarstjóra og bæjarfulltrúum klukkan 17 næstkomandi fimmtudag, 8. maí. Á vef Akureyrarbæjar er fólk hvatt til þess að taka daginn frá og láta í ljós skoðanir sínar um hverfið.
Lagt er upp með tvær meginspurningar:
1. Hvað er gott við hverfið þitt?
2. Hvað mætti betur fara?
Ásthildur Sturludóttir, bæjarstjóri, opnar fundinn með stuttu ávarpi en síðan brjóta íbúar Giljahverfis spurningarnar tvær hér að ofan til mergjar.
Bæjarfulltrúar verða í salnum og hafa það hlutverk að skrifa niður þær hugmyndir, umkvartanir, lof og last, sem fram koma í umræðuhópum íbúanna. Megináhersla verður lögð á að samtalið fari fram á forsendum bæjarbúa.
Niðurstöðum fundanna, ábendingum og hugmyndum, verður komið í réttan farveg og á framfæri við stjórnendur sveitarfélagsins og pólitískt kjörna fulltrúa til frekari úrvinnslu.
Á hverjum fundi verður einblínt á nærumhverfið með íbúum hvers hverfis en að sjálfsögðu eru öll velkomin á alla fundina.
Mættu til fundar og taktu þátt í umræðunni um hverfið þitt.
Grillaðar pylsur að loknum fundi!
COMMENTS