Ashani Arulananthan lýkur doktorsprófi við Háskólann á Akureyri

Ashani Arulananthan varði doktorsritgerð sína í auðlindafræðum við Háskólann á Akureyri þann 7. október síðastliðinn. Ritgerðin ber heitið Áhrif fjölflúorsetinna alkýlefna á kísilþörunga og sambýlisörverur þeirra á norðurslóðum. Þetta kemur fram í tilkynningu á vef Háskólans á Akureyri.
Ashani er frá Srí Lanka og hóf doktorsnám við HA árið 2023. Áður rannsakaði hún meðal annars kóralrif og örplast. Leiðbeinendur hennar voru Oddur Þór Vilhelmsson, Bettina Scholz og Margrét Auður Sigurbjörnsdóttir. Andmælendur voru Peter G. Kroth við Háskólann í Konstanz og Angela Wulff við Háskólann í Gautaborg.
Í rannsókn sinni skoðaði Ashani áhrif PFAS-efna á tvær tegundir sjávarkísilþörunga. PFAS eru þrávirk mengunarefni sem hafa meðal annars greinst á heimskautasvæðum. Kísilþörungar gegna mikilvægu hlutverki í fæðuvefjum og því skiptir máli að skilja hvernig mengunin hefur áhrif á þá.
Tengdar greinar
Uppfært: 29. október 2026










