Keppendur frá Júdódeild KA stóðu sig með prýði á Haustmóti Judosambands Íslands, JSÍ, sem fram fór síðastliðinn laugardag, 4. október, í íþróttahúsi Vallaskóla á Selfossi. Fjallað er um árangur þeirra á vef KA.
Dagmar Steinþórsdóttir, sem er núverandi Íslandsmeistari í sínum flokki, sýndi enn og aftur styrk sinn með því að vinna til gullverðlauna í 70 kg flokki U13. Þetta er þriðji sigur Dagmar í röð á móti, sem sýnir stöðugleika og framfarir í frammistöðu hennar.
Jóhanna Heiðrún Ágústsdóttir náði einnig frábærum árangri með silfurverðlaun í -40 kg flokki U13, og Valur Fannar Eiríksson bætti í safnið með bronsverðlaunum í -45 kg flokki U15.
„Þessi flotti árangur er vitnisburður um sterka stöðu Júdódeildar KA og það öfluga æskulýðsstarf sem þar fer fram,“ segir í tilkynningu KA.
COMMENTS