Á undanförnum árum hefur kennsla á Sjúkrahúsinu á Akureyri hlotið afar jákvæðar umsagnir frá nemendum. Nemendur lýsa hvetjandi og lærdómsríku umhverfi þar sem fjölbreytt námstækifæri eru í boði. Þetta kemur fram í tilkynningu á vef Sjúkrahússins á Akureyri. Árlega eru veittar viðurkenningar fyrir klíníska kennslu á SAk en niðurstöðurnar byggja á könnunum sem mennta- og vísindadeild sendir nemendum að loknu verknámi á sjúkrahúsinu.
„Það er okkur á mennta- og vísindadeild mikil ánægja að sjá hversu vel nemendur tala um kennsluna hér á sjúkrahúsinu. Þetta er vitnisburður um það mikla og metnaðarfulla starf sem starfsfólk sjúkrahússins leggur í að leiðbeina og styðja framtíðarheilbrigðisstarfsfólk,“ segir Laufey Hrólfsdóttir, deildarstjóri mennta- og vísindadeildar SAk, á heimasíðu sjúkrahússins.
Í ár hlutu tvær deildir sérstaka viðurkenningu fyrir framúrskarandi klíníska kennslu:
- Lyflækningadeild – fyrir kennslu hjúkrunarnema
- Svæfinga- og gjörgæsludeild – fyrir kennslu læknanema og unglækna
Auk þess voru veittar einstaklingsviðurkenningar til starfsfólks sem hefur skarað fram úr í klínískri kennslu:
- Gunnar Þór Gunnarsson, hjartalæknir og dósent við læknadeild HÍ – fyrir framúrskarandi kennslu læknanema
- María Ásgeirsdóttir, svæfingarhjúkrunarfræðingur – fyrir framúrskarandi kennslu hjúkrunarnema
- Oddný Jóhanna Zoponíasdóttir, sjúkraliði á skurðlækningadeild – fyrir framúrskarandi kennslu sjúkraliðanema
Mennta- og vísindadeildin vill koma á framfæri innilegu þakklæti til allra þeirra sem leggja sig fram við kennslu og stuðning við nemendur – bæði þeirra sem kenna formlega og annarra sem taka þátt í móttöku og leiðsögn. Þessi samvinna skiptir sköpum fyrir gæði klínískrar kennslu og jákvæða upplifun nemenda.
COMMENTS