Gamanmyndahátíð Flateyrar ætlar í samstarfi við Reykjavík Foto að efna til 48 stunda gamanmyndakeppni á netinu. Keppnin er opin öllum og gengur út á það að gera gamanmynd á aðeins 48 klukkustundum. Landsmenn kjósa svo um á netinu hver skemmtilegasta myndin verður.
Árið 2019 hélt Gamanmyndahátíð Flateyrar slíka keppni á Flateyri með gamansömum árangri en nú verður keppnin haldin í gegnum vefsíðu hátíðarinnar, sökum þess ástands sem ríkir í heiminum.
,,Það hefur sjaldan eða aldrei verið betri tími til að reyna að sjá það skemmtilega og spaugilega í lífi okkar og deila með náunganum. Við vonumst til að þátttaka verði góð, bæði á meðal þeirra sem eru að stíga sín fyrstu skref í kvikmyndagerð, sem og hjá þeim sem starfa við fagið. Enda fá önnur verkefni í gangi þessa stundina og því kærkomið að leyfa sköpunarkraftinum að njóta sín með því að setja saman stutta og skemmtilega gamanmynd,“ segir í tilkynningunni.
Keppnin fer þannig fram að lið eða einstaklingar skrá sig til leiks á vefsíðunni www.IcelandComedyFilmFestival.com
Klukkan 20:00 þann 27. mars fá skráð lið send til sín nákvæmari upplýsingar um keppnina og þurfa liðin að skila inn tilbúnni gamanmynd fyrir klukkan 20:00 þann 29. mars. Dómnefnd mun velja fyndnustu stuttmyndirnar sem verða birtar opinberlega þar sem landsmenn fá að kjósa fyndnustu 48 stunda gamanmyndina.
![](https://www.kaffid.is/wp-content/uploads/2020/03/EOS-M50-body.jpeg)
Fyndnasta gamanmyndin að mati landsmanna fær að launum glæsilega Canon EOS M50 4k myndavél ásamt 15-45mm linsu frá Reykjavík Foto.
Öll lið sem komast í úrslit í 48 stunda gamanmyndakeppnina fá tvö hátíðararmbönd á Gamanmyndahátíð Flateyrar sem fer fram dagana 13-16 ágúst 2020.
Leikreglur:
- Keppnin er opin öllum, hvort sem þú er að gera þína fyrstu stuttmynd eða átt tíu Eddur upp á hillu hjá þér.
- Fjöldi einstaklinga í hverju liði er frjáls. Stakir einstaklingar geta líka teikið þátt.
- Allt myndefni sem er notað í myndinni skal vera tekið upp dagana 27.-29. mars 2020
- Myndin skal ekki vera lengri en þrjár mínútur. (180 sekúntur)
- Myndin skal fylgja því þema og þeim leikreglum sem verða sendar út til liðanna 27. mars.
- Fyndnasta myndin verður valin með áhorfendakosningu á netinu.
- Gamanmyndahátíð Flateyrar hefur leyfi til að sýna myndirnar á þeim viðburðum sem hátíðin stendur fyrir.
UMMÆLI