Hollvinasamtökin hafa fjármagnað kaup á rúmlega 20 lækningatækjum síðustu ár. Myndin er tekin við afhendingu nýs fæðingarrúms á sjúkrahúsinu á Akureyri 2016. Mynd: Ingibjörg Jónsdóttir.
Hollvinir SAk eru frjáls félagasamtök sem hafa það markmið að stuðla að bættum lækningatækjaútbúnaði á Sjúkrahúsinu á Akureyri. Eitt stærsta verkefni þeirra til þessa er svo kölluð ferðafóstra, sem afhent verður sjúkrahúsinu við hátíðlega athöfn á laugardaginn kemur, 10. febrúar.
Ferðafóstra er ferðagjörgæsla fyrir nýbura sem þarf að flytja í sjúkrabílum, flugvélum eða þyrlum vegna mikilla veikinda og er bráðnauðsynlegur búnaður fyrir sjúkrahúsið. Þetta er eitt af kostnaðarsamari verkefnum samtakanna hingað til en ferðafóstran kostar í kringum 30 milljónir.
Forseti Íslands heiðursgestur á samkomunni
Forseti Íslands, Guðni Th. Jóhannesson, hefur sýnt verkefninu mikinn áhuga en hann verður sérstakur heiðursgestur við afhendingu ferðafóstrunnar á laugardaginn og mun ávarpa samkomuna. Jóhannes G. Bjarnason flytur tölu fyrir hönd Hollvina SAk ásamt því að læknir útskýrir fyrir gestum hvernig ferðafóstran virkar og hvernig hún mun koma til með að bjarga barnslífum í framhaldinu.
Jóhannes G. Bjarnason er formaður samtakanna.
Nú þegar safnað hundruðum milljóna fyrir SAk
Jóhannes G. Bjarnason, formaður samtakanna, segir í samtali við Kaffið að þetta sé einskonar uppskeruhátíð fyrir þau sem að samtökunum koma en á þessum rúmu þremur árum frá því að Hollvinir SAk voru stofnaðir hefur þeim tekist að safna nokkur hundruðum milljóna og afhent sjúkrahúsinu í formi tækjabúnaðar af flottustu gerð. Meðal þeirra verkefna sem samtökin hafa staðið að má nefna: fullkomna öndunarvél, fullkomna ristilspeglunarvél, fæðingarrúm, 30 ný sjúkrarúm á lyfjadeildina, allt nýtt inn á geðdeildina og hún endurnýjuð algjörlega, nýir monitorar, stólar og margt fleira.
Ekki til göfugri tilgangur en að bjarga nýfæddum börnum
,,Við erum mjög spennt að afhenda þetta því þetta mun bjarga barnslífum og ég held að það sé ekki hægt að hafa mikið göfugri tilgang með félagsskap heldur en að bjarga nýfæddum börnum. Markmiðið með tækjunum okkar er að þau séu bestu tækin á landinu. Það er mikill metnaður á bakvið þetta,“ segir Jóhannes.
Það geta allir gerst Hollvinir SAk HÉR – Það kostar aðeins 5.000 kr. á ári að leggja þessum frábæru samtökum lið og styrkja Sjúkrahúsið á Akureyri.
UMMÆLI