fbpx

Forráðamann dragi úr fjölda einstaklinga í tengslaneti barna sinna

Forráðamann dragi úr fjölda einstaklinga í tengslaneti barna sinna

Börn hitti ekki börn úr öðrum skólahópum

Skólar, leikskólar og íþróttafélög hafa verið að endurskipuleggja fyrirkomulag sitt undanfarið til að fara eftir fyrirmælum heilbrigðisráðherra um takmarkanir á skólastarfi og samkomum. Bæði stóru íþróttafélögin á Akureyri, Þór og KA, hafa tilkynnt að engar æfingar yngri flokka munu fara fram á meðan samkomubanni stendur í það minnsta. Í pósti frá samhæfingarstöð almannavarna sem barst í dag eru forráðamenn barna hvattir til að draga úr fjölda einstaklinga í tengslaneti barna sinna utan skólatíma til að vinna ekki gegn þeim fyrirmælum sem heilbrigðisráðherra hefur sett og ekki láta börn hitta önnur börn úr öðrum skólahópum en þeirra eigin.

Í póstinum eru foreldrar og forráðamenn eru beðnir að hafa eftirfarandi í huga:

  • • Skólafélagar sem ekki eru í sama hópi í skólastarfinu ættu ekki að vera í návígi utan skóla.
  • • Hafi börnin þroska til að fara eftir leiðbeiningum sem snúa að minni snertingu við vini er ekki útilokað að þau geti hist í leikjum. Leikirnir mega ekki fela í sér beina snertingu, notkun á sameiginlegum leikföngum eða búnaði sem snertur er með berum höndum.
  • • Börn og ungmenni ættu ávallt að þvo sér vel um hendur bæði áður en þau hitta félaga sína og eftir að þau koma heim.
  • • Fjölskyldur ættu að hafa í huga að ef börnin umgangast mikið vini eða frændsystkin úr öðrum skólum eða skólahópum þá verður til tenging milli hópa sem annars væru aðskildir. Slíkt ætti að forðast eins og kostur er.
  • • Fjölskyldur eru hvattar til að nýta sér tæknina til að halda góðum tengslum við ástvini sem eru í áhættuhópum vegna COVID-19 sýkinga, eldra fólk og fólk með undirliggjandi sjúkdóma.
  • • Einnig væri hægt að nota tækifærið að kenna börnunum að skrifa sendibréf og æfa í leiðinni skrift, stafsetningu, virkja ímyndunaraflið og hugsa í lausnum þegar kemur að samskiptum við ástvini okkar.

Varðandi heimili þar sem sumir eru í sóttkví en aðrir ekki:

  • • Börn sem hafa þroska og getu til að sinna eigin hreinlæti og halda viðeigandi fjarlægð við foreldra sem eru í sóttkví sem og við skólafélaga geta áfram sinnt námi í skólastofu. Mikilvægt er að gæta að hreinlæti t.d. nota sér salernisaðstöðu.
  • • Foreldrar stálpaðra barna sem eru í sóttkví og geta haldið viðeigandi fjarlægð frá börnunum meðan á sóttkví stendur geta áfram sinnt vinnu á vinnustað ef fjarvinna er ekki í boði.
  • • Heimilið verður allt að fara í sóttkví ef börn hafa ekki þroska eða getu til að virða þær ráðstafanir sem gilda í sóttkví. Önnur leið til að leysa slíkt væri ef þeir sem ekki eru í sóttkví færu eitthvað annað á meðan á henni stendur.

UMMÆLI