Fríða Karlsdóttir opnar sýningu á Leyni

Fríða Karlsdóttir opnar sýninguna Memento mori á Leyni í göngugötunni, fimmtudaginn 30. júlí klukkan 20. Sýningin stendur yfir í tvær vikur.
Fríða Karlsdóttir (f. 1994) útskrifaðist af myndlistarbraut Gerrit Rietveld Academie í Amsterdam í Hollandi 2020 og býr nú og starfar á Akureyri.
Fríða vinnur með sögusagnir í gegnum blandaða miðla, vídeóverk, skúlptúra, textaverk og ýmiss konar handverk. Verk hennar líkjast oft náttúrulegum fyrirbærum og innihalda sterkar táknmyndir, þannig dramatíserar hún hversdagsleikann og segir frá einlægum upplifunum.
Fríða hefur sýnt bæði hér á landi og erlendis, má þar nefna einkasýningu hennar Ekkert eftir nema mýktin í Listasafninu á Akureyri, Þú veist hvað þau segja um… í Mjólkurbúðinni og Murky Waters á Sigurhæðum. Hún hefur komið að uppsetningu og skipulagningu fjölmargra menningarviðburða eins og Boreal Screendance Festival, Salon de Refuses í Deiglunni, Akureyrarvöku og Barnamenningarhátíð auk fjölbreyttra viðburða í Kaktus sýningarými.
Tengdar greinar
Uppfært: 6. september 2026










