Guðlaugur Arnarsson hefur verið ráðinn viðskiptaþróunarstjóri Stefnu, hugbúnaðarhúss. Hann hóf störf 1. október í höfuðstöðvum fyrirtækisins á Akureyri. Síðasta áratuginn starfaði Guðlaugur á fyrirtækjasviði Vodafone, þar af fimm ár sem deildarstjóri.
Guðlaugur er 42 ára Húsvíkingur, kunnur handknattleiksmaður og þjálfari. Hann lék mörg ár í efstu deild á Íslandi og erlendis um tíma. Hann þjálfaði síðan Fram í þrjú ár og Val í önnur þrjú og varð liðið Íslands- og bikarmeistari undir stjórn þeirra Óskars Bjarna Óskarssonar.
Guðlaugur er menntaður félagsfræðingur. Eiginkona hans er Brynja Dögg Hermannsdóttir, talmeinafræðingur. Þau eiga þrjá syni, Arnar, Hermann og Elvar.
Mjög spennandi
„Það er gríðarlega spennandi verkefni að koma inn í starf viðskiptaþróunarstjóra hjá Stefnu á þessum tímapunkti, verkefni sem er uppfullt af tækifærum og áskorunum sem verður mjög spennandi að takast á við,“ segir Guðlaugur. „Stefna er í dag að þjónusta stóran hóp fyrirtækja og á sama tíma er verið að vinna að þróun frábærra lausna sem snúa að sjálfvirkni og sjálfsafgreiðslu. Fyrirtæki eru í dag flest að hefja stafræna vegferð á einn eða annan hátt og er Stefna kjörinn samstarfsaðili í þeirri þróun. Ég hlakka mikið til að vinna með núverandi og nýjum viðskiptavinum í þeirri vegferð,“ segir Guðlaugur Arnarsson.
Fjöldi nýrra starfa
Stefna er ört vaxandi fyrirtæki. „Við höfum verið dugleg að þróa nýjungar og skapa okkur tækifæri á breiðum grunni í upplýsingatækni. Á þessu ári höfum við í Stefnu þróað áfram kerfi fyrir innheimtu og umsjón bílastæða, jafnframt kerfi fyrir sjálfsafgreiðslu á veitingahúsum, nýtt vefverslunarkerfi, nýtt Take away kerfi og fjöldann allan af öppum. Að auki höfum við smíðað marga tugi vefa og er þó ekki allt upp talið. Það eru því engar ýkjur að hér er nóg um að vera,“ segir Matthías Rögnvaldsson, framkvæmdastjóri fyrirtækisins.
„Á síðasta ári réðum við starfsmenn í 5 ný stöðugildi á Akureyri og í ár gerum við enn betur því 6 ný stöðugildi hafa orðið til hér í bænum. Í dag starfa 33 starfsmenn hjá Stefnu, þar af 27 hér á Akureyri. Þessu fylgir samt fullt af áskorunum á þessum óvissutímum. En við ætlum að leyfa okkur að horfa björtum augum á framtíðina og vonumst til þess að halda áfram að skila framúrskarandi þjónustu og lausnum,“ segir Matthías.
UMMÆLI