Sjúkrahúsið á Akureyri fær 50 milljónir króna skv. nýju tillögunni.
Mikil óánægja hefur ríkt með fjárframlög til heilbrigðisstofnanna á landsbyggðinni í nýja fjárlagafrumvarpinu en nú hefur ríkisstjórnin samþykkt tillögu meirihluta fjárlaganefndar um að framlög til heilbrigðisstofnanna á landsbyggðinni verði aukin um 450 milljónir króna.
Þessi breytingartillaga er til umfjöllunar við aðra umræðu um fjárlög næsta árs sem nú stendur yfir á Alþingi.
Þá eigi framlaginu að vera skipt þannig að 200 milljónir króna renni til að styrkja sjúkrasvið heilbrigðisstofnanna, 200 milljónir króna fari í að styrkja heilsugæsluþátt þeirra og 50 milljónir króna renni til Sjúkrahússins á Akureyri til að efla og þróa sérhæfða göngudeildarþjónustu spítalans.
Þetta kemur fram í tilkynningu á vef Stjórnarráðsins en þar er einnig haft eftir Svandísi Svavarsdóttur, heilbrigðisráðherra:
„Það er forgangsmál að allir landsmenn fái notið góðrar heilbrigðisþjónustu, óháð efnahag og búsetu. Þetta viðbótarframlag styður við þá stefnu.“
UMMÆLI