![Thora sker sig úr.](http://www.kaffid.is/wp-content/uploads/2016/11/11167678_10153351084026178_5175705260032034946_n-400x504.jpg)
Thora sker sig úr.
Thora Karlsdóttir, akureyringur og listakona, framkvæmdi gjörning sem er eflaust orðinn mörgum kunnugur. Þá eyddi hún heilum 9 mánuðum eða 280 dögum í kjól, frá mars til desember 2015. Á hverjum einasta degi klæddist hún nýjum kjól, undantekningarlaust, og gekk í þeim til allra verka.
Thora segir gjörninginn oft hafa verið krefjandi en algjörlega þess virði.
![Klassískt kjólaveður.](http://www.kaffid.is/wp-content/uploads/2016/11/15025225_1603340656636863_8685009127533909528_o-400x419.jpg)
Klassískt kjólaveður.
Nú er komið að því að Thora er að gefa út bók um kjólagjörninginn. Bókin ber heitið 280 kjólar og í henni leynast myndir af kjólum hvers einasta dags sem að eiginmaður hennar og ljósmyndari, Björn Jónsson, tók af henni á hinum ýmsu stöðum og í hinum ýmsu stellingum. Bókin verður gefin út í 280 eintökum og mun hver einasta bóka hafa mismunandi kápumynd en fólki stendur til boða að velja sína eigin kápumynd.
![Líklega einn af þessum dögum þegar það verður þreytandi að vera alltaf í kjól.](http://www.kaffid.is/wp-content/uploads/2016/11/11169906_10153351083496178_2309170624814527846_n-400x548.jpg)
Líklega einn af þessum dögum þegar það verður þreytandi að vera alltaf í kjól.
Thora hefur haldið úti sýningu í Listasafninu, Ketilhúsi, þar sem kjólarnir eru til sýnis. Næstkomandi laugardag, 12.nóvember mun hún halda kynningu þar á bókinni kl.15.00 og eru allir innilega hvattir til að mæta. Þar verður hægt að panta sér bók, skoða myndirnar, kjólana, spurja listakonuna spjörunum úr og njóta listarinnar.
UMMÆLI