fbpx

Útileguráð Ásgeirs – 5 atriði sem þú verður að hafa á hreinu fyrir útileguna

Ásgeir Jóhann Kristinsson er 25 ára Akureyringur og útileguáhugamaður sem hefur nokkur nytsamleg ráð fyrir þá sem ætla sér í útilegu í sumar. Ásgeir segir í samtali við Kaffið að það sé ekkert verra en að vera illa undirbúinn fyrir útileguna og því sé bráðnauðsynlegt að hafa þessi 5 atriði á hreinu áður en lagt er í hann. ,,Það getur skemmt annars góða útilegu ef maður er ekki með þessa hluti á hreinu,” segir Ásgeir.

Ásgeir undirbýr sig vel fyrir útilegur.

Nr. 1
Ásgeir segir það skipta öllu máli að vera vel klæddur. Maður veit aldrei hverju íslenska veðrið tekur upp á og þó svo að veðurspáin sé góð getur hún breyst á örskotsstundu. Þess vegna er mikilvægt að hafa með sér hlý föt, vettlinga, ullarsokka, teppi o.þ.h. til þess að verða ekki kalt. Ásgeir hefur orð á því að ef manni verður kalt í útilegu sé þetta bara búið, þú skemmtir þér aldrei vel ef þú ert að drepast úr kulda.

Nr. 2
Að vera vel skóaður er lykilatriði samkvæmt Ásgeiri. Það gerir góða útilegu slæma að verða blautur í fæturnar og verða kalt á tánum. Fyrir sniðuga ferðalanga væri líka sterkur leikur að taka með sér auka par af skóm og eiga til skiptanna, skildi maður blotna.

Ásgeir er þaulvanur útilegumaður og veit hvað hann syngur.

Nr. 3
Gott föðurland er undirstaðan (bókstaflega) að góðri útilegu, segir Ásgeir. Það þýðir ekkert að skella sér í eitthvað drasl sem vill kalla sig föðurland, það þarf að vera alvöru. Það heldur kroppnum heitum og þér glöðum.

Nr. 4
Eitt mikilvægasta atriðið er þó að vera vel vökvaður og upplifa aldrei þorsta í útilegunni. Ásgeir segir það ekki skemmtilegt að taka með sér of lítið af drykkjum, það verði mörgum útilegum að falli.

Nr. 5
Það er ýmislegt sem getur farið úrskeiðis í útilegum og þá sérstaklega á Íslandi með veðurskilyrði og annað.
,,Mikilvægasta atriðið af þessum öllum er að pakka góða skapinu með í útileguna,” segir Ásgeir. Það eru engir vankantar sem að góða skapið getur ekki sigrað og því skelfilegt að gleyma að taka það með.

Ásgeir lærði af reynslunni og mætir alltaf vel klæddur í útilegur, með góða skapið meðferðis.

UMMÆLI