fbpx

Jafnt hjá Akureyri og ÍBV í háspennuleik

krissi201510

Kristján Orri Jóhannsson leikur á als oddi þessa dagana.

Akureyri og ÍBV skildu jöfn í lokaleik 12.umferðar Olís-deildar karla í KA-heimilinu en leiknum lauk nú rétt í þessu. Lokatölur 24-24 eftir æsilegar lokamínútur.

Eyjamenn hafa á öflugu liði að skipa og höfðu yfirhöndina framan af. Heimamönnum tókst svo að vinna sig inn í leikinn og náðu frumkvæðinu í síðari hálfleik. Að lokum þurftu liðin að skiptast á jafnan hlut sem verður líklega að teljast sanngjörn úrslit.

Það má segja að leikurinn hafi snúist upp í einvígi tveggja frábærra hægri hornamanna því þeir Kristján Orri Jóhannsson, Akureyri og Theodór Sigurbjörnsson, ÍBV, voru einfaldlega í allt öðrum gæðaflokki en aðrir leikmenn vallarins í dag.

Sóknarleikur beggja liða var frekar slakur ef horft er framhjá þessum tveim leikmönnum. Mikið var um tapaða bolta og léleg skot nema þegar þeir Kristján og Theodór áttu í hlut en Kristján Orri skoraði 13 af 24 mörkum Akureyrar og Theodór 12 af 24 mörkum ÍBV.

Fjórði leikur Akureyrar í röð án taps en liðið er eftir sem áður í neðsta sæti deildarinnar, nú með átta stig.

Markaskorarar Akureyrar: Kristján Orri Jóhannsson 13, Karolis Stropus 5, Igor Kopyshynskyi 3, Garðar Már Jónsson 1, Arnór Þorri Þorsteinsson 1, Mindaugas Dumcius 1.

Tomas Olason varði 14 skot í marki Akureyrar.

Markaskorarar ÍBV: Theodór Sigurbjörnsson 12, Sigurbergur Sveinsson 4, Ágúst Emil Grétarsson 2, Dagur Arnarsson 2, Friðrik Jónsson 1, Kári Kristján Kristjánsson 1, Magnús Stefánsson 1, Grétar Þór Eyþórsson 1.

Kolbeinn Arnarson varði 7 skot í marki ÍBV og Andri Ísak Sigfússon eitt.

UMMÆLI