Umspil 1.deildar kvenna um sæti í efstu deild kvenna á næstu leiktíð hófst í dag þegar KA/Þór fékk FH í heimsókn í KA-heimilið en bæði lið léku í 1.deildinni í vetur. Í hinu einvíginu mætast Selfoss og HK en Selfoss endaði í næstneðsta sæti efstu deildar í vetur.
KA/Þór mættu ákveðnar til leiks og tóku völdin snemma í sínar hendur. Þær leiddu með þrem mörkum í leikhléi, 15-12. Hafnarfjarðarkonur voru ekki á því að gefast upp og hart var barist í síðari hálfleik en lítið skorað. Fór svo að lokum að KA/Þór vann tveggja marka sigur, 24-22 og eru því komnar í 1-0 í einvíginu en vinna þarf tvo leiki til að komast í úrslitaeinvígið.
Aldís Ásta Heimisdóttir og Martha Hermannsdóttir voru markahæstar í liði KA/Þórs með sjö mörk. Þá átti Sunna Guðrún Pétursdóttir mikilvægar markvörslur á lokakaflanum.
Næsti leikur liðanna er á sunnudag þegar þau mætast á heimavelli FH.
Markaskorarar KA/Þórs: Aldís Ásta Heimisdóttir 7, Martha Hermannsdóttir 7, Katrín Vilhjálmsdóttir 4, Ásdís Guðmundsdóttir 3, Kara Rún Árnadóttir 2, Steinunn Guðjónsdóttir 1.
Markaskorarar FH: Ingibjörg Pálmadóttir 6, Fanney Þóra Þórsdóttir 3, Birna Íris Helgadóttir 3, Diljá Sigurðardóttir 3, Laufey Ásta Höskuldsdóttir 3, Arndís Sara Þórsdóttir 2, Hildur Marín Andrésdóttir 2.
UMMÆLI