Katt­ar­eig­end­ur eigi að lúta sömu regl­um og aðrir dýra­eig­end­ur

Snævarr Örn Georgsson, umhverfisverkfræðingur á Akureyri, segir að honum finnist að kattareigendur eigi að lúta sömu reglum og aðrir dýraeigendur og eigi að sinna dýrum sínum og gæta þess að þau valdi öðrum hvorki skaða né ónæði. Snævarr segir að engin dýr nema kettir fái að ganga laus í þéttbýli víðast hvar á landinu en rætt er við Snævarr á mbl.is í dag.

Ákvörðun var tekin í bæjarstjórn Akureyrar í síðustu viku um að banna lausagöngu katta í bænum frá árinu 2025. Ljóst er að skiptar skoðanir eru á ákvörðuninni en málið hefur vakið töluverða athygli um land allt. Snævarr segir að þeim sem voga sér að gera athugasemdir við lausagöngu katta eða biðji kattareigendur um að hafa gætur á gæludýrum sínum sé oft svarað yf­ir­gangi, per­sónu­árás­um og jafn­vel fúkyrðum.

„Menn vilja ekki missa þau for­rétt­indi að geta látið ketti sína valsa um allt eft­ir­lits­laust. Katt­ar­eig­end­ur segja að það sé svo vont fyr­ir ketti að tak­marka frelsi þeirra og að það sé í eðli þeirra að vera frjáls­ir! En ef það er svona hræðilegt fyr­ir kett­ina að setja þeim tak­mörk þá henta þeir bara alls ekki sem gælu­dýr í þétt­býli,“ seg­ir Snæv­arr.

Hann segir að kannanir sýni það að meirihluti fólks vilji banna lausagöngu katta og að það komi betur og betur í ljós að hávær minnihluti vilji ekki bera ábyrgð á gæludýrum sínum.