„Nóttin var sú ágæt ein“ þarf að vera spilað á öllum útvarpstöðum allan sólahringinn. Við erum komin of fjarri Guði varðandi jólin. Nú eru jólin ekki sorgleg. Fólk í gamla daga átti virkilega sorgleg og erfið jól. Allar minningarnar og sögurnar sem heyrast nú eru ekki um þegar þú varst búinn að vinna húsverk í 18 klukkutíma, nær dauða en lífi, og fékkst rautt mjölmikið epli sem bragðaðist eins og sandur, en þér fannst það gott, því það var sérstakt. Nú heyrast engar jólasögur, það man enginn eftir jólunum fyrir 5 árum. Fólk man það erfiða, og svo fékk það ágætis gjöf og var glatt. Þess vegna þarf sviptingar og níðingshátt í aðdraganda jólana. Virkilega að dansa á línunni um hvað teljist vera barnaþrælkun og óvild í garð náungans.
Í Betlehem beibí Djísus bjó, veifaði hendi og sorgin dó, en fyrst þurfti sviptingar elsku barnaló síðan ánægju ég þér færi Með vísnasöng ég vögguna þína hræri. Því nú snýst þetta um svala jólasveina á mjólkurfernum sem gefa hluti í stað þess, eins og nöfn margra þeirra gefa til kynna, að svipta þeim. Jólin eru án sviptinga, og ef hugsað er til þeirra sem minna mega sín þá gætum við verið að svipta meira til þess að jafna leikinn. Ekki dugir að einungis þræla fólki út heldur þarf það að missa hluti, svo það viti hvað það eigi, líkt og góðu drengirnir í Cinderella syngja um í laginu „Don’t Know What You Got (Till It’s Gone).“
Krossfestum jólasveinana þegar þeir koma til byggða einn af öðrum, því nú þurfum við 13 fórnir en ekki einungis einn lítinn Jesúm. Það er svo fallegt en sorglegt að láta þá deyja fyrir syndir okkar.
UMMÆLI