N1 mótið í fótbolta hefst á Akureyri í dag og stendur til 6. júlí. Þetta er í 33. sinn sem mótið er haldið og þátttaka hefur aldrei verið meiri.
Alls eru 204 lið skráð til leiks á mótið í ár og 1.960 þátttakendur sem munu taka þátt. Þá er eitt erlent lið skráð til leiks sem kemur frá Bandaríkjunum.
Framkvæmd mótsins er í höndum KA en Sævar Pétursson framkvæmdasjóri KA ræddi við Morgunblaðið um mótið í dag
„N1 mótið er vissulega einn af hápunktum sumarsins hjá okkur í KA og fátt sem toppar að sjá einbeitinguna og gleðina í andlitum keppenda þegar þeir mæta til leiks hér nyrðra,“ sagði Sævar Pétursson við mbl.is.
„Það eru forréttindi að fá að hafa umsjón með þessu frábæra móti enda samstarfið við N1, þjálfara, aðstandendur og að sjálfsögðu keppendurna sjálfa alltaf jafn gott. Þá daga sem mótið stendur yfir setja liðin sterkan svip á bæjarlífið og ég veit að allir munu njóta sín vel hér þessa daga. Við minnum svo forráðamenn á að vera duglega við að taka myndir af drengjunum og merkja með #n1mótið á samfélagsmiðlum og halda þannig áfram að skrá þannig söguna.“
UMMÆLI