fbpx

Rannsaka andlát ferðamanns á Húsavík sem reyndist smitaður af kórónaveirunni

Rannsaka andlát ferðamanns á Húsavík sem reyndist smitaður af kórónaveirunni

Erlendur ferðamaður sem leitaði til Heil­brigðis­stofn­un­ar Norður­lands á Húsa­vík vegna al­var­legra veik­inda í gær reyndist smitaður af COVID-19 veirunni. Maðurinn lést stuttu eftir komuna á stofnunina en COVID-19 hefur ekki verið staðfest sem dánarorsök. Þetta kemur fram í til­kynn­ingu frá al­manna­vörn­um en nú er unnið að því að skera úr um dánarorsökina.

Tilkynningu landlæknis, sóttvarnalæknis og almannavarna má lesa í heild sinni hér að neðan.

Rannsókn á andláti vegna hugsanlegs COVID-19; röskun á starfi heilbrigðisstofnunar Norðurlands

Erlendur ferðamaður sem leitaði til Heilbrigðisstofnunar Norðurlands á Húsavík vegna alvarlegra veikinda í gær reyndist smitaður af veirunni sem veldur COVID-19 sjúkdómnum. Maðurinn lést stuttu eftir komuna á stofnunina. Dánarorsök liggur ekki fyrir en sjúkdómseinkennin voru ekki dæmigerð fyrir COVID-19. Unnið er að því að skera úr um dánarorsökina.

Margþætt vinna tekur nú við vegna þessa máls, bæði varðandi andlát mannsinns og stuðning við hans nánustu. Þá þarf að styðja við og setja þá heilbrigðisstarfsmenn sem komu að meðferð mannsins í sóttkví, sótthreinsa heilsugæslustöðina ásamt því að tryggja nauðsynlega heilbrigðisþjónustu fyrir Húsvíkinga. Öll þessi verkefni eru unnin á vegum almannavarnadeildar ríkislögreglustjóra, í náinni samvinnu við sóttvarnalækni, landlækni, Rauða krossinn og er unnið í samstarfi við aðgerðastjórn almannavarna á Norðurlandi eystra og heilbrigðisstofnun Norðurlands.

Starfsemi Heilbrigðisstofnunar Norðurlands á Húsavík verður í lágmarki, en eins og áður sagði er allt kapp lag á að tryggja að hægt verði að halda uppi mikilvægri þjónustu við íbúa á starfssvæði hennar og aðra sem kunna að þurfa á þjónustu hennar að halda. Tilkynningar er að vænta um hvernig þjónustu verður hagað.

Almannavarnadeild ríkislögreglustjóra

Sóttvarnalæknir

Embætti landlæknis

UMMÆLI