<strong>Söfnuðu 500 þúsund krónum fyrir matargjafir á Akureyri</strong>

Söfnuðu 500 þúsund krónum fyrir matargjafir á Akureyri

Krónan afhenti hjálparsamtökum rúmlega 450 gjafakort á dögunum. Gjafakortin eru afrakstur jólasöfnunar sem fram fór í verslunum Krónunnar á aðventunni, þar sem viðskiptavinum bauðst að styrkja hjálparsamtök í sínu nærsamfélagi sem sjá um matarúthlutanir í aðdraganda jóla. Viðskiptavinir söfnuðu rúmlega 4,6 milljónum króna og lagði Krónan 5,4 milljón krónur á móti þeirri upphæð. Alls söfnuðust því 10 milljónir í jólastyrkjasöfnun Krónunnar þetta árið, sem veittar eru í formi rúmlega 450 gjafakorta. 
 
Söfnunin fór þannig fram að viðskiptavinum bauðst að bæta 500 krónum við innkaupakörfuna í lokaskrefi greiðslu í verslunum Krónunnar, og myndi greiðslan renna til hjálparsamtaka í nærsamfélagi sem styðja þau sem þurfa á mataraðstoð að halda fyrir jólin. Styrkirnir í ár eru sem fyrr segir veittir í formi gjafakorta og styrkþegar velja því sjálfir sína matarkörfu.   

Alls söfnuðu Krónan og viðskiptavinir 500 þúsund krónum á Akureyri. Velferðarsjóði Eyjafjarðarsvæðis voru því færð 25 gjafakort á dögunum, hvert upp á 20 þúsund krónur.

Góðgerðarsamtökin sem hljóta styrk frá viðskiptavinum og Krónunni í ár eru Árnessýslusjóðurinn góði, Jólasjóður Fjarðabyggðar, Landakirkja í Vestmannaeyjum, Mæðrastyrksnefnd Akraness, Mæðrastyrksnefnd Hafnarfjarðar, Mæðrastyrksnefnd Kópavogs, Mæðrastyrksnefnd Reykjavíkur, Rauðikross Víkursvæðis, Selfosskirkja, Soroptimistafélag Mosfellsbæjar, Stórólfshvolfskirkja, Velferðarsjóður Eyjafjarðarsvæðis og Velferðarsvið Reykjanesbæjar. 

 Guðrún Aðalsteinsdóttir, framkvæmdastjóri Krónunnar, segir einstaklega ánægjulegt hvernig til tókst. „Jólastyrkjasöfnunin er okkur í Krónunni afar kær. Desember getur verið erfiður tími á mörgum heimilum, ekki síst á tímum verðbólgu og þrenginga. Þetta er í þriðja skipti sem við bjóðum viðskiptavinum að láta gott af sér leiða með þessum hætti og við trúum vart öðru en að gjafmildi þeirra muni létta undir á fjölmörgum heimilum fyrir jólin,“ segir Guðrún. 

Sambíó

UMMÆLI