Helena Dögg Hilmarsdóttir, ung móðir á Akureyri, opnaði sig á samfélagsmiðlum í vikunni og greindi frá ofbeldi og áreiti sem hún hefur orðið fyrir undanfarin ár. Helena hefur orðið fyrir heimilisofbeldi, umsáturseinelti, líkamsárásum og eignarspjöllum og hefur kært til lögreglu. Hún segir að lítið hafi gerst í hennar máli undanfarin ár.
Í umfjöllun Fréttablaðsins um málið segir að Helena sé ósátt með að málið taki svo langan tíma í kerfinu. „Lögreglan kemur á staðinn, ég er með áverka og fer upp á slysó, hann fer í varðhald en núna hefur lögreglan gert lítið sem ekkert í málinu í tvö ár og það er stanslaust verið að ýta á að gefa út ákæru áður en málið fyrnist,“ segir Helena sem kveðst þó þakklát fyrir þá aðstoð sem lögreglan hefur veitt henni.
Ofbeldismaður Helenu gengur laus í dag og Helena segist glíma við stanslausan kvíða, óöryggi og áfallastreitu í kjölfar ofbeldisins sem hún hefur verið beitt. Hún hefur ítrekað reynt að fá nálgunarbann á ofbeldismanninn en fengið þær upplýsingar að rannsókn á málinu sé ekki hafin. Þegar hún hefur beðið um útskýringar á því hefur staðgengill lögreglustjóra borið fyrir sig fjárskort.
Helena lýsir hrottafengnu ofbeldi sem hún hefur orðið fyrir í myndbandi sem hún birti á Twitter. Bíll hennar hefur ítrekað orðið fyrir skemmdum, sömuleiðis bíll móður hennar, frænda og vinar. Ofbeldismaðurinn ásækir hana með símtölum allan daginn og sendir ógnandi skilaboð sem gefa til kynna að hann sitji um hana.
Hún segir að hún hafi oft neyðst til þess að eyða háum fjárhæðum í fíkniefni handa honum þar sem hún hafi annars fengið að finna fyrir því. Í eitt sinn hafi hann slegið hana svo fast að hún missti heyrn um stund. Í annað skipti henti hann símanum hennar í Glerá svo að hún gæti ekki hringt á lögreglu.
UMMÆLI