fbpx

Vill efla þátttöku ungs fólks í stjórnmálum

 

melkorka-kaffid

Melkorka Ýrr

Frá því eg man eftr mér hef ég haft sterkar skoðanir á þjóðfélagsmálum og umræðum sem tengjast samfélaginu,” segir Melkorka Ýrr Yrsudóttir 18 ára stúlka frá Akureyri sem situr í 6. sæti á framboðslista Sjálfstæðisflokksins í Norðaustur kjördæmi. Melkorka stundar nám við félagsfræðibraut Menntaskólans á Akureyri og æfir dans með skólanum.

Vill leggja áherslu á málefni unga fólksins. 

Melkorka hefur setið í stjórn Varðar, félags ungra sjálfstæðismanna á Akureyri síðastliðin 2 ár. Hún segir að áhuginn á stjórnmálum hafi þó kviknað mun fyrr. ,,Áhuginn kviknaði almennilega í kringum sveitastjórnarkosningarnar fyrir tveimur árum en hugtakið stjórnmál er svo afar víðtækt svo í raun kviknaði áhuginn mun fyrr.”

Melkorka vill leggja áherslu á mál sem snerta unga fólkið í landinu eins og húsnæðismál og menntun á landsbyggðinni. Hennar helsta baráttumál mun þó vera að efla þátttöku ungs fólks í stjórnmálum. ,,Á þessum tíma vil ég aðallega nota krafta mína í að efla þáttöku ungs folks í  stjórnmálum, þar sem slök þátttaka unga fólksins er stórt vandamál að mínu mati.” 

Viðbrögðin við framboðinu hafa verið jákvæð og segir hún að fólk á öllum aldri taki vel í það. ,,Vinir mínir hafa ekki jafn mikinn áhuga á stjórnmálum og ég en ég finn fyrir því að þau eru að reyna koma sér inn í þetta. Ég reyni auðvitað að fræða þau um hin og þessi málefni þegar þau spyrja.”

Grunnstefna Sjálfstæðisflokksins heillaði

,,Þegar ég ákvað að ganga í flokkinn og gerast stjórnarmeðlimur Varðar, félag ungra sjálfstæðismanna á Akureyri þá leit eg á þetta tækifæri sem ákveðin stökkpall, til að koma skoðunum unga fólksins á framfæri. Ég leit á það sem betri valkost en að vera með einhver leiðindi á kommentakerfum netmiðlana eða á samfélagsmiðlum.” segir Melkorka og bætir við að grunnstefna Sjálfstæðisflokksins hafi heillað hana og að hún styðji frelsi og sjálfstæði einstaklinga.

Það sem heillaði hana einnig við flokkinn var að hann hafi sýnt skoðunum og hugmyndum unga fólksins mikinn áhuga. ,,Það sannaðist á síðasta landsfundi þar sem ungir sjálfstæðismenn létu mikið fyrir sér fara og var það tvímælalaust hvatning fyrir mig að halda áfram að sinna störfum innan flokksins.”

Áslaug Arna fyrirmyndin

Melkorka segir að mikilvægt sé að hafa góðar fyrirmyndir þegar maður tekur sín fyrstu skref í pólitík og aðspurð nefnir hún Áslaugu Örnu Sigurbjörnsdóttur sem hafnaði í 4.sæti í prófkjöri Sjálfstæðismanna í Reykjavík á dögunum. ,,Áslaug Arna er ung kona sem lætur engan vaða yfir sig og er með puttann á púlsinum þegar kemur að stjórnmálum.”

Áslaug Arna hefur vakið mikla athygli fyrir skoðanir sínar og er afar vinsæl meðal ungs fólks í landinu. Hún er dugleg að tjá sig á samfélagsmiðlum líkt og Melkorka sem segist hafa mikinn áhuga á þeim og hvernig þeir virka.

Stefnir út í nám 

Eftir menntaskóla stefnir Melkorka á að ferðast og afla sér sem mestri reynslu víðsvegar um heiminn. Eftir það stefnir hún út í nám við annaðhvort innanhúsarkitekt eða lögfræði og stjórnmál. ,,Ég hef gríðarlegan áhuga á hönnun, hvort sem það tengist tísku eða munum,” segir þessi unga og efnilega kona.

Að lokum hvetur hún alla, sérstaklega ungt fólk að kynna sér málefni flokkanna, mæta á kjörstað 29. október og kjósa samkvæmt sinni samvisku.

sjalfstaedisflokkurinn-kaffid

Fólkið sem skipar efstu sex sætin á framboðslista Sjálfstæðisflokksins í Norðaustur kjördæmi.

UMMÆLI