Siðanefnd RÚV hefur hafnað endurupptökubeiðni sjónvarpsmannsins Helga Seljan vegna máls hans um brot á siðareglum RÚV. Siðanefndin úrskurðaði í mars að Helgi hefði gerst brotlegur vegna ummæla sinna um Samherja. Þetta kemur fram á mbl.is í dag.
Sjá einnig: Krefst endurupptöku og segir Sigrúnu vanhæfa
Helgi Seljan krafðist endurupptöku á dómi siðanefndar RÚV á dögunum en siðanefndin taldi, eftir kæru Samherja, Helga hafa brotið siðareglur stofnunarinnar. Helgi sagði meðal annars að Sigrún Stefánsdóttir, einn siðanefndarmanna, væri vanhæf vegna margvíslegra tengsla við Samherja.
Í svari siðanefndar við endurupptökubeiðni Helga segir meðal annars:
„Hvað varðar hæfi eins nefndarmanna, Sigrúnar Stefánsdóttur, sem tilfnefnd var í siðanefnd RÚV af starfsmannafélagi RÚV eftir að kæra barst, þá kemur ekkert fram í bréfi þínu sem gefur til kynna að hún hafi ekki verið hæf í skilningi stjórnsýslulaga til að kveða upp úrskurðinn. Afmarkað verkefni Sigrúnar er varðar Vísindaskóla unga fólksins, sem er vikulangt námskeið fyrir börn á aldrinum 11-13 ára og er innan Háskólans á Akukreyri, lá fyrir og er greitt af Háskólanum á Akureyri, þó starfsemi skólans sé vissulega studd af 20-25 fyrirtækjum á Akureyri. Seta hennar í stjórn fjölmiðilsins N4, undanfarin sjö ár, sem sjálfstæður stjórnarmaður er öllum kunn. Hún er ekki eigandi fjölmiðilsins né á fjölmiðillinn sérstakra og verulegra hagsmuna að gæta í málinu. Fjölmiðillinn er jafnframt með skýrar reglur um ritstjórnarlegt sjálfstæði og stjórn hans kemur að engu leyti að ritstjórn og daglegum störfum. Því hefur ekkert komið fram sem raskar því mati að hún hafi verið hæf til að kveða upp úrskurð í málinu og ekkert komið fram sem dregur óhlutdrægni hennar með réttu í efa.“
UMMÆLI