fbpx

Jákvæð rekstrarafkoma Akureyrarbæjar

Göngugatan á Akureyri

Göngugatan á Akureyri

Bæjarstjórn Akureyrar afgreiddi á fundi sínum í gær fjárhagsáætlun ársins 2017 sem og þriggja ára áætlun áranna 2018-2020.

Áætlunin var lögð fram til fyrri umræðu í bæjarstjórn í byrjun nóvember og tók rekstrarniðurstaðan breytingum til batnaðar í meðförum bæjarráðs og nefnda á milli umræðna. Þannig gerir samþykkt fjárhagsáætlun ráð fyrir að rekstrarafkoma A- og B-hluta verði jákvæð um 394 milljónir króna.

“Það er jákvætt að heildarrekstur sveitarfélagsins skuli vera jákvæður en hins vegar er áhyggjuefni að A-hluti er áætlaður með rekstrartapi. Launahækkanir á liðnum árum hafa haft mikil áhrif á reksturinn en ljóst er að verkefni okkar er að koma á jafnvægi í rekstri A-hluta,” segir Guðmundur Baldvin Guðmundsson formaður bæjarráðs á vefsíðunni Akureyri.is.

Minnihluti bæjarstjórnar sat hjá í atkvæðagreiðslunni og settu bæjarfulltrúar Sjálfstæðisflokksins fram eftirfarandi bókun við afgreiðsluna.

„Við bæjarfulltrúar Sjálfstæðisflokksins í bæjarstjórn getum ekki samþykkt fyrirliggjandi tillögu að fjárhagsáætlun fyrir bæjarsjóð Akureyrar árin 2017-2020. Í áætluninni er gert ráð fyrir því að A-hluti bæjarsjóðs verði rekinn með halla að upphæð kr. 111.095.000 árið 2017. Það er í raun óásættanleg niðurstaða og hefði mátt leggja meiri vinnu í að ná hallalausum rekstri í A-hlutanum,” segir m.a. í bókun.

 

UMMÆLI