fbpx

6,5 millj­arðar í nýja legu­deild á Sjúkrahúsinu á Ak­ur­eyri

6,5 millj­arðar í nýja legu­deild á Sjúkrahúsinu á Ak­ur­eyri

Gert er ráð fyrir 6,5 milljörðum króna í framkvæmdir við nýbyggingu fyrir nýja legudeild við Sjúkrahúsið á Akureyri á tíma fjármálaáætlunar árin 2021–2025. Svandís Svavarsdóttir heilbrigðisráðherra greindi frá þessu þegar hún ávarpaði ársfund Sjúkrahússins á Akureyri í vikunni.

Undanfarin ár hafa nokkrir vinnuhópar á vegum Sjúkrahússins á Akureyri fjallað um framtíðaruppbyggingu og nýtingu húsnæðis við sjúkrahúsið á Akureyri. Niðurstaða þessarar vinnu er sú að ný legudeildarbygging sé eini raunhæfi kosturinn til að leysa húsnæðisvanda sjúkrahússins. Í fjáraukalögum þessa árs var Sjúkrahúsinu á Akureyri úthlutað 80 milljónum króna til að hefja frumathugun og gerð útboðsgagna fyrir nýja legudeildarbyggingu. Verkefnið er nú til umfjöllunar hjá Framkvæmdasýslu ríkisins.

Ný legudeildarbygging hefur verið á dagskrá hjá Sjúkrahúsinu á Akureyri í mörg ár: „Hjá mér hefur það verið sérstakt áhugamál og ég lagt á það áherslu í embætti að tryggja þessa framkvæmd í fjármálaáætlun“ sagði Svandís Svavarsdóttir í ávarpi sínu og jafnframt að þetta væri eitt þeirra mála sem hún væri hvað stoltust af á sinni tíð sem heilbrigðisráðherra.

„Ný legudeildarbygging mun gjörbreyta aðstæðum sjúklinga sem við núverandi aðstæður liggja á fjölbýlum, auk þess sem skortur er á einangrunarherbergum. Einnig er húsnæði geðdeildarinnar ekki eins og best verður á kosið fyrir starfsemina og staðsetning hennar óhentug,“ segir í tilkynningu.

Ráðherra nefndi einnig að fyrir lægi ákvörðun um fjármagn til að endurnýja myndgreiningarbúnað við Sjúkrahúsið á Akureyri og enn fremur að heimild hafi verið veitt sjúkrahúsinu til greininga á verusýnum sem gerir sjúkrahúsinu m.a. kleift að annast greiningu sýna vegna COVID-19.

UMMÆLI