Tveir sigrar í röð hjá þeim félögum
Það var nóg um að vera í íþróttaheiminum í kvöld og voru fimm Akureyringar í eldlínunni víða um Evrópu.
Fótbolti
Birkir Bjarnason lék allan leikinn fyrir Basel þegar liðið heimsótti PSG í riðlakeppni Meistaradeildar Evrópu. Heimamenn í PSG unnu 3-0 sigur með mörkum Angel Di Maria, Lucas Moura og Edinson Cavani.
Á sama tíma var Aron Einar Gunnarsson í eldlínunni með Cardiff sem tók á móti Sheffield Wednesday í ensku B-deildinni. Aron lék allan leikinn í 1-1 jafntefli. Mark Cardiff skoraði Peter Whittingham með skoti beint úr aukaspyrnu sem dæmd var eftir að brotið var á Aroni.
Handbolti
Óvænt úrslit urðu í danska handboltanum þegar Arnór Atlason og félagar í Álaborg töpuðu á heimavelli gegn Ribe-Esbjerg, 24-26. Fyrsta tap Álaborgar í vetur en Arnór komst ekki á blað í leiknum.
Frændurnir Guðmundur Hólmar Helgason og Geir Guðmundsson voru í lykilhlutverki hjá Cesson-Rennes sem vann sinn annan leik í röð í frönsku úrvalsdeildinni. Cesson-Rennes vann öruggan tíu marka sigur, 33-23 og var sigurinn aldrei í hættu. Geir skoraði fjögur mörk úr sjö skotum en Guðmundur var með tvö mörk úr fimm skotum.
Sjá einnig
Aron Einar í nærmynd – Atli og Palli gerðu mig að þeim íþróttamanni sem ég er
UMMÆLI