Slökkvilið Akureyrar stendur fyrir skipulögðum bruna á bænum Ytra-Krossanesi í dag, bæði íbúðarhúsinu og hlöðunni. Áhyggjufullir Akureyringar geta því andað léttar, vitandi að engin hætta stafar af þeim reyk sem sést hefur stíga upp norðan meginn í bænum í dag.
Slökkviliðið hefur nú í einhvern tíma haft húsið til afnota og nýtt til ýmsra æfinga, t.d. við reykköfun. Fyrir nokkrum dögum síðan var sú ákvörðun loks tekin að brenna húsið alveg, enda stóð ekki til að húsið stæði þarna til frambúðar.
Að sjálfsögðu var bruninn nýttur til ýmsra æfinga, en Slökkvilið Akureyrar, Slökkvilið Grýtubakkahrepps og Lögreglan á Akureyri voru öll á staðnum. Slökkviliðin hafa haldið brunanum í skefjum í allan morgun og lögreglan nýtti brunann til æfinga í notkun dróna og hitamyndavéla.
UMMÆLI